Ἐν Κισσάμῳ, πόλει τῳ τῶν Χανίων, ἀνδρόγυνόν τι ὑποστρέψαν οἴκαδε τὴν μὲν οἰκίαν διεῤῥαγεῖσαν, τὸ δὲ γλωσσόκομον ἀνεῳγὸς εὗρον καὶ τὰ χρήματα τὰ ἐν αὐτῷ φυλασσόμενα πάντα ἀνηρπασμένα, καὶ εὐθὺς ἁνὴρ ἅμα καὶ ἡ αὐτοῦ γύνη ἐζήτουν ἐν τῇ οἰκίᾳ τὰ τὸν διαῤῥήκτην φανοῦντα, ὃ οὐδενὸς ἂν προσδοκήσαντος ταχὺ ξυνέβη· θριξὶ γὰρ κυνὸς ἐπιτυχόντες ἐπὶ τῇ κατασκευῇ αὐτίκα τὸν κλῶπα ἐφώρασαν, ὃς ὅμορός ἐστιν αὐτοῖς ἑκκαιδεκέτης, ὁ δὲ κύων αὐτοῦ ἴδιος. τῶν οὖν τοξοτῶν ἐπικληθέντων καὶ κατὰ τὸν οἶκον τοῦ ἐφήβου γενομένων, ξυνεὶς τὴν τοῦ κυνὸς προδοσίαν περὶ τούτου ἐρωτώμενος ἑαυτόν τε καὶ τῶν ξυνεργησάντων τῇ πράξει τὰ ὀνόματα παρέδωκε, εἰσὶ δὲ οὗτοι δύο. καὶ ὡμολόγησεν σὺν αὐτοῖς εἰσπεσεῖν εἰς τὴν οἰκίαν καὶ τὸ γλωσσόκομον ἀνοιγνύναι ἡγεμόνι χρωμένοις ὀπτικῷ ἀπὸ τοῦ Youtube πρὸς τὸ ἄνοιγμα, τὸν δὲ κύνα ὀλιγωρήσας ἀφεῖναι αὐτοῖς ἐπισπέσθαι καὶ ἐπὶ τῶν δίφρων καὶ σκιμπόδων καθίζειν καὶ ἀναστρέφεσθαι, οὗ ὀλίγον ὕστερον δίκην ἔδωκε περὶ οὐδενὸς ποιησάμενος, κεκλοφότας δὲ χίλια καὶ πεντακόσια εὐρὼ ἀπιέναι. εἰσὶ δὲ οἱ συγκλέπται μὲν ὁμήλικες, τὸ δὲ γένος τῶν κλεπτῶν οἱ μὲν δύο εἰσὶ Ἕλληνες, ὁ δὲ εἷς ἀλλόφυλος. ἐγένετο δὲ ταῦτα πρὸ ἑβδομάδος καὶ ἡμέρας.
